Kutt joot noh Huss
(Text & Musik: Oliver Kerk)

1.

Zoeets will ich mich ens bedanke, für ühr Jeduld un joode Moot.
Dat ihr als Publikum hück ovend jedanz, jeklatsch un zojehoot.
Ich hoff et hät üch joot jefalle, dat wöör für uns dä schönste Luhn,
denn echte Freud kann mer nit koufe, en keinem Laade nirjendwo.

Se weet verschenk un kütt vun Hätze, vun Minsch zo Minsch janz einfach su.

2.

Jlich maach ´mer Schluß, ´t weet affjebaut, dä janze Kroom em Bus vestaut.
Jläuvt nit dat dat su einfach wöör. Nit dä Kroom nä, nä, et Hätz ess schwer!
Denn mit Leech un Instrumente, Verstärker , Mischer , Kabeldress,
weet nevvebei janz still un heimlich och ene Zauber enjepack.

Ne Zauber der affläuf wemmer he zesamme sin.
Dröm maat et joot bess nächstes Mool!

Ref.

Kutt joot noh Huss, kutt joot noh Huss.
Ühr leeve Lück, kutt joot noh Huss

3.

Jlich drenke mer eine, un dann weet noch jet jeschwaad
un dann wünsch m´r üch wie schon jesaat:

Ref.

Kutt joot noh Huss...